ACTIVIDADE 6.1

6.1 ANIMACIÓN POR ORDENADOR:

A animación consiste no deseño e aplicación de movemento a personaxes ou obxectos a través de diferentes técnicas. De tal modo, en función destas técnicas, pódense distinguir varias modalidades de animación: Animación mediante debuxos, animación a partir de figuras tridimensionais, animación mediante imaxes xeradas por ordenador e animación realizada con técnicas mixtas.
A actividade principal das empresas obxecto deste estudo é a prestación de servizos de animación por ordenador, froito do desenvolvemento dos denominados gráficos xerados por ordenador (CG) e a súa aplicación ao cine, televisión, publicidade, etc. na que se inclúen fundamentalmente a animación por ordenador 2D e a animación por ordenador 3D:
- Animación 2D: Hoxe en día, os estudos de animación 2D utilizan soportes dixitais nos seus traballos, polo que o proceso de animación  realízase fundamentalmente a través de medios informáticos. Se se empregan técnicas clásicas, haberá que capturar os debuxos para a súa posterior animación. Se se realizan por medio de programas informáticos, aforrarase o proceso de captura.
- Animación 3D: Baséase nun sistema informático que xera un espazo virtual con tres dimensións, no que se modelan, a partir de redes de malla, os decorados e as personaxes.

Os servizos ofrecidos por este tipo de empresas posúen múltiples aplicacións, entre as que destacan as seguintes:
- Arquitectura e enxeñería: Servizos de infografía (ver glosario) aplicada á arquitectura, enxeñería civil, proxectos de urbanismo e paisaxes, que permiten a previsualización dos modelos con anterioridade ou paralelamente ao proceso de construción.
- Publicidade, televisión e cine: Deseño e animacións 3D para spots publicitarios, series de televisión, películas, etc., así como todo tipo de servizos de postprodución.
- Deseño e animacións para vídeos corporativos e presentacións de proxectos para empresas privadas e institucións públicas.
- Multimedia: deseño e animacións 3D en páxinas web, CD Roms interactivos, etc.

Desde o punto de vista estatístico, as actividades económicas  clasifícanse seguindo a Clasificación de Actividades Económicas (CNAE-93). Dependendo do tipo de actividade, este terá un código diferente. Adicionalmente, existe outro sistema de clasificación chamado SIC (Standard Industrial Classification). Nos seguintes cadros  amosámosche a clasificación da actividade considerada.

CNAE-93	SIC
92.11 Produción cinematográfica	78.13 Produción de películas cinematográficas
	78.14 Produción de películas

Algunhas das actividades reflectidas nesta clasificación, ou estreitamente relacionadas coas mesmas,  foran tratadas xa con maior profundidade  noutras guías:

- Produción audiovisual.
- Produción multimedia.
- Gabinete de deseño gráfico.
- Gabinete de programación. 

Podes consultalas na páxina web: http://guias.bicgalicia.es

O cadro seguinte recolle catro aspectos clave identificados por outros emprendedores, e que che poden axudar a reflexionar sobre as condicións que debe reunir a túa idea de negocio.

A IDEA
1. Orixe da idea	O desenvolvemento das novas tecnoloxías propiciaron a aparición dun nicho de mercado para este tipo de actividade.
2. Concepto de negocio	Prestación de servizos de animación por ordenador e desenvolvemento de producións propias.
3. Claves competitivas	Altos niveis de calidade a prezos inferiores que a animación tradicional. Prazos competitivos. Variedade da tipoloxía de clientes. Versatilidade e adaptación  ás demandas dos seus clientes.
4. Aspectos críticos	Dificultade na captación de clientela: inestabilidade e descontinuidade produtiva.